iii!

litli frændi Arason var skírður á Skírdag og fékk nafnið Arnór. pabbi hans og mamma slógu tvær flugur í einu höggi og giftu sig að lokinni nafngiftinni. sennilega fylltust allar blómabúðir bæjarins á nokkrum mínútum þegar gestirnir fóru úr kirkjunni á leið í veisluna. við fórum hins vegar heim og sóttum vagninn svo litla fröken gúðmúnsen gæti lúrt úti á svölum í veislunni.

eftir fínerís trakteringar lögðum við af stað í bústað í Borgarfirði. vorum í bústað 4 nætur, fram til mánudagsins og nutum þess svo sannarlega.

Brynhildur var hvers manns hugljúfi, eins og vanalega, fór tvisvar í pottinn, hló og skríkti og lék við hvern sinn fingur.

Á Skírdag grillaði Sverrir lax og á Föstudaginn langa eldaði pabbi lax, við borðuðum síðan kjúkling á laugardeginum en til að halda í lax-átið var reyktur lax í forrétt. við fengum síðan engan lax á páskadag en þeim mun meira súkkulaði í staðinn. við keyptum fínerís Konsúm egg sem entist heillengi.

ég er búin að vera kvefuð í hátt í mánuð núna og er gjörsamlega að verða biluð á því. allir eitlar stokkbólgnir og mér liður bara eins og tusku. ullabjakk.

Nýjasta áhugamálið mitt er prjónaskapur. Ég hef alltaf af og til tekið prjónaskorpur, hef prjónað fjöldann allan af treflum og tók húfuskorpu fyrir nokkrum árum síðan. Í fyrra þegar ég komst að því að ég væri barnshafandi keypti ég prjónablöð og garn og ætlaði svo sannarlega að prjóna á litla krílið. Ég byrjaði á teppi í mars í fyrra og kláraði það í febrúar síðastliðnum. Þetta átti að verða lítið og sætt ungbarnateppi en það dugar yfir mig alla. … og ég prjónaði aldrei á litla bumbukrílið.

María litla frænka mín (sem er ekkert lítil lengur) prjónaði sína fyrstu lopapeysu um daginn og vinkona mín úr bumbuhópnum prjónaði kjól og þetta tvennt varð til þess að ég fór af stað og fitjaði upp …

Ég prjónaði mér lopavesti með munsturbekk á rétt tæpri viku og er búin að fitja upp og byrjuð á næsta verkefni. Ætla að gera mér annað vesti en prjóna minni stærð og á stærri prjónum (til að gera það aðeins gisnara) og hafa það líka síðara.

vinnuárshátíðin hans Sverris var haldin síðasta laugardag á hótel Selfossi. Hvílíka snilldin. Nefndin hafði rætt það að halda árshátíðina í útlöndum en svo fór sem fór og árshátíðin var haldin á Selfossi í staðinn. Þemað var hins vegar útlent, vegvísar á hótelinu voru flugvallamerkingar og síðan tók við vegabréfaeftirlit með tollvörðum og flugfreyjur buðu fólk velkomið og buðu fordrykk. Mjög flott allt saman.

Skemmtiatriðin voru þó nokkur og flestöll flutt af innanbúðarmönnum, Sverrir tók virkan þátt í þeim flestum, enda sérlegur gítarleikari vinnustaðarins. Ingó sem tók þátt í Stjörnuleitinni á Stöð 2 og er núna söngvarinn í Veðurguðunum kom síðan og spilaði og söng og mikið kom hann mér á óvart. Ég hef svo sem aldrei kynnt mér hann sem tónlistarmann svo ég bjóst ekki við neinu en hann er hinn fínasti söngvari og stórskemmtilegur.

Mikið var þægilegt að geta síðan bara rölt upp á herbergi þegar ég fékk nóg (sem var eldsnemma, eða um miðnætti) og skilið Sverri eftir í stuðinu.

Heilsan mín var ekki sem best þar sem ég hafði farið á konukvöld með minni vinnu kvöldið áður og endað í útstáelsi í miðbæ Reykjavíkur - auk þess sem ég er enn með flensuskít og kvef.

Nú styttist óðum í árshátíð bumbuhópsins míns sem er búinn að skipta um nafn og síðan verður árshátíð míns vinnustaðar viku síðar.

Það er nóg að gera við úttektir úr skemmtanakvótanum sem safnaðist upp í fyrra

nau, ég á barasta 8 ára bloggafmæli í dag tíminn flýgur

hvað hefur gerst á undanförnum átta árum? “það var fyrir átta árum að ég kvaddi þig með tárum …” neinei, ekkert slíkt.
fyrir átta árum bjó ég í kompunni á njálunni, 24 fm undir súð með klósett frammi á gangi. nú bý ég í rúmlega 100 fm íbúð með fjölskyldunni minni. magnað!

já það er kominn mars og brynhildur vex og dafnar og þroskast.
tíminn flýgur og allar hugmyndirnar mínar eru akkúrat það, hugmyndir.
er farin að prjóna og sanka að mér garni og ætla mér mikið í þeim efnum. er komin upp að mynstri í lopavesti, langar til að prjóna kjól, lopapeysu á brynhildi, ermar og margt margt fleira. sjáum hvað setur.

þykir leitt að hafa ekki skrásett betur þessa undanförnu 6 mánuði en vissulega hefur margt gengið á. þarf að koma mér í að setja lykilorð á þessa síðu eða bara loka henni og opna nýja. virkja sjálfa mig aðeins í þessu fyrrum stóra áhugamáli mínu, vefviðmóti og fikteríi.

næstu þrjár helgar eru undirlagðar af skemmtanalífi og árshátíðum. vill til að ég á uppsafnaðan kvóta.

mikið svakalega skrifa ég oft og mikið hérna á síðuna, ég verð að fara að slaka á!

annars man ég varla lengur hvað ég talaði um áður en brynhildur fæddist … ég gæti rætt um þjóðmálin, efnahagsástand þjóðarinnar, nýju 100 daga ríkisstjórnina og allt það - en æ, það eru varla fréttir um neitt annað þessa mánuðina og ég hreinlega nenni því ekki. mikið er ég samt ánægð með nýja menntamálaráðherrann, hana katrínu jakobsdóttur. en það er ekki laust við að maður finni fyrir aldrinum þegar ráðherra er jafnaldri manns.

held að húmorinn minn sé í hvíld - eins og svefninn minn. hlakka til að fá jafn mikla hvíld og svefninn minn hefur fengið undanfarna mánuði.

það er nefnilega það.

búin að uppfæra síðuna hennar brynhildar og setti inn slatta af myndum líka! gaman að þessu.

í kvöld var fundur hjá hrossakjötsvinafélagi hafnarfjarðar og var mæting meiri en nokkru sinni fyrr. stórglæsilegur félagskapur.

ég pakkaði loks niður jólunum í dag, reyndar er serían enn úti á svölum en allt smádótið er allavega komið í kassa. ég sem var búin að bíða þolinmóð eftir því að það kæmi sér sjálft ofan í kassa, en ég hjálpaði því í dag og það er sem sagt ekki að sjá að hér hafi verið haldin jól. hér sést hins vegar mjög vel að haldnir hafa verið þvottadagar undanfarið þar sem stofan er gjörsamlega undirlögð af þvotti. ef ég bíð nógu lengi, ætli þvotturinn brjóti sig saman sjálfur?

við heilsuðum nýju ári 2008 á akureyri og byrjuðum strax í fyrstu viku ársins að leita okkur að húsnæði. við skoðuðum nokkrar íbúðir staðsettar um allan hafnarfjörð og m.a. eina á hjallabraut, viku síðar skoðuðum við hana aftur og gerðum tilboð og aftur viku síðar skrifuðum við undir kaupsamning. í millitíðinni komumst við að því að ég var eigi kona einsömul heldur bar ég barn undir belti. þetta var því afar viðburðaríkur janúarmánuður. sameiginleg afmælisgjöf foreldra minna (í lok janúar og byrjun febrúar) var oggulítil samfella sem þau fengu að geyma fyrir okkur eftir að hafa fengið fréttir um væntanlegan afkomanda.

sverrir vann ötullega að mastersritgerðinni sinni, fór í marga langa göngutúra og kortlagði gönguleiðir ferðamanna um miðborgina og útlistaði kosti og galla hverrar leiðar fyrir sig. þannig opnaði hann augu mín allavega fyrir skipulagsleysi í borginni og hversu margt er ábótavant. var ég orðin vel skóluð í fræðunum og skreytti mig með fagmáli við hvert tækifæri. eða ekki. í lok maí varði hann verkefnið sitt með glæsibrag og útskrifaðist.

félagslífið á vinnustaðnum mínum var blómlegt sem aldrei fyrr. þorrablót í febrúarbyrjun, hópefli í marsbyrjun, konukvöld í marslok, árshátíð í apríl, tiltektardagur í maí … ég tók að mér hlutverk söngkonu í Enn einu bandinu sem lék á árshátíðinni og þótti bandið afar vel heppnað, sérstaklega þegar litið var til æfingafjölda - eða fæð öllu heldur, þar sem æfingarnar urðu aðeins þrjár.

í apríl fengum við loks afhenta íbúðina okkar og vörðum öllum okkar stundum við málningarvinnu og þvíumlíkt og fengum aldeilis góða aðstoð við það frá ættingjum og vinum, sem sömuleiðis fylktu liði og hjálpuðu til við flutningana ekki löngu síðar. það voru þreyttir kollar sem lögðust á koddann 19. apríl eldsnemma kvölds, um kl 22, akkúrat þegar nágrannarnir á neðri hæðinni höfðu boðið til innflutningspartýs. það kom þó ekki að sök og sváfum við vært okkar fyrstu nótt í Firðinum.

við fórum nokkrum sinnum norður á árinu, í bústað og í útilegu en ágúst var með eindæmum viðburðaríkur. þá fórum við að sjá eric clapton á tónleikum, tæpri viku síðar fórum við í vegagerðarferð, komum heim rétt til að láta niður í tösku því ferðinni var heitið norður í víðidal. þar fórum við í afmælisveislu sem var uppfull af hæfileikafólki, hljóðfæri á staðnum sem gestir gripu í eftir hentugleika og hljómsveit sem söng lag um kremkex með súkkulaði. í lok maí tók ég þátt í gæsun berglindar vinkonu minnar en þau hugi giftu sig í júní með pomp og pragt á ákaflega fallegum degi. við fórum í ekki síðra brúðkaup norður í Reykjadal sem var talsvert frábrugðið því fyrrnefnda, því trumbusláttur réð ríkjum fyrir hina látlausu athöfn sem haldin var utandyra.

ekkert varð af utanlandsferðum þetta árið en í staðinn fórum við að sjá Bob Dylan þegar hann spilaði í Laugardalshöll og síðan sáum við Eric Clapton í Egilshöll í ágúst. það tók nú ansi mikið á veglegan kviðinn að standa upp á endann í þrjá tíma en mikið lifandis ósköp var það samt gaman.

eftir því sem áætlaður fæðingardagur barnsins nálgaðist fór þreytan að segja til sín en þó vann ég allt þar til ég var gengin 39 vikur. allan tímann hafði ég nefnilega verið handviss um að ganga fram yfir, og ég var gangsett þegar ég var komin 13 daga fram yfir. fæðingin gekk stórslysalaust fyrir sig en tók nokkurn toll af mér þar sem ég missti 2 lítra af blóði eða um 40% blóðmagns líkamans. árangur erfiðisins var dásamleg lítil stúlka sem var skírð í lok október og hlaut nafnið Brynhildur Daðína.

Brynhildur Daðína fæddist sama dag og FH-ingar urðu Íslandsmeistarar í fótbolta í fjórða sinn á fimm árum og það var stoltur afi sem sá um að tilkynna fjölskyldunni um nýjasta FH-inginn.

mánuðirnir þrír sem í kjölfarið komu hafa liðið á einhvern undarlegan hátt, allir dagar eins, ekkert að gerast en þó svo undur margt. litla skinnið er með magakveisu og fær krampaköst á kvöldin þar sem hún engist um og hágrætur en þar fyrir utan er hún ákaflega brosmild og dafnar vel.

litla fjölskyldan hélt jólin saman í fyrsta sinn hér heima og fengum við foreldra okkar í mat. það var virkilega notalegt en verður sennilega talsvert öðruvísi næstu jól þegar sú stutta verður farin að gera ýmislegt annað en að liggja kyrr.

við tökum nýju ári fagnandi og hlökkum til allra þeirra spennandi “fyrstu” hluta sem munu gerast næstu mánuðina.
Gleðilegt nýtt ár!